शेवटचे वळण
शेवटच्या ह्या वळणावरती
पुन्हा भेटल्या जुन्या मैत्रिणी
अंतर आता थोडे उरले
कळून चुकले तेव्हा मजसी …१
जिला हवी जैसीच भरारी
उंच दूर वा गगनावरती
तैसी घेऊन चिमण्या सार्या
पुन्हा परतल्या झाडावरती.…२
दाणापाणी संसाराची
नसेच चिंता कुणा पिलांची
आठवणी त्या जुन्या सुखविती
नकोच कोणा बात उद्याची…३
किलबिल किलबिल गप्पागोष्टी
सूर्य असेतो क्षितिजावरती
परतुन येतां नभी शर्वरी
चिडीचुप्प होतील सर्वही…४
जरी झोपल्या सर्व सुखानी
स्वप्न कालचे असेल नयनी
खुदकन हसतिल झोपेमध्ये
ओढुन दुलई अंधाराची…५
-------------------------------------
लेखणी अरुंधतीची -
No comments:
Post a Comment