चैतन्य

चैतन्य

( मात्रा - 10:11 )

मी तुला पाहिले, दुरुनी सखया आज

लव संधिप्रकाशि, उजळता किंचित मुख

घनगंभीर गमे , ओझरते तव रूप

परि क्षणात ठसले, अगाध तव दर्शन

 

तव रूप अलौकिक, अनुभवता एकदा

मम चित्त जाहले, सैरभैर सावळ्या

संसार सुखाचा, असार ठरला सख्या

तुजपुढती विटला, भवसागरही मधुरा

 

तव आकर्षण मज, परतूही देइना

संसार मोडुनी, आले तुज भेटण्या

तू वीर धीर अन, अधीर पाऊल माझे

बाधले न काटे, परि मज रस्त्यामधले

 

तो प्रकाशक्षण मज, हुरहुर लावुन जाय

वितळून जाहले,  नभी निलीमा मीच

हा देह कुणाचा,  प्रश्न संपला आज

पोपडा पडे तो, चैतन्य उरे एक!

--------------------------

#लेखणीअरुंधतीची-