गगनचाफा / बूच

 

 

गगनचाफा / बूच

 पावसानी जरा जरा माघार घ्यायला सुरवात केली असताना, हवेत पावसाची नमी टिकून असताना, हवेत थोडा गारवा झुळकेसोबत फिरू लागला असताना,

गगनजाई, गगनचाफा, गगनमोगरा ह्या सुंदर सुंदर नावांनी निरनिराळ्या ठिकाणी ओळखलं जाणारं बूचाचं झाड फुलायला लागलं आहे.

फुलांमुळे झाड आणि मुलांमुळे मायबाप ओळखले जाऊ लागले की, ते धन्य होतात.

( मात्रा - 8: 8: 11 )

 

अधोमुखी ही फुले लोंबती; शुभ्र सुवासिक किती

जणू घंटिका नाजुक नाजुक; देवालयी रुळती ।।

 

दीपमाळ तेवते शांतशी; सुरम्य धवल ज्योती 

पवनासंगे हलती डुलती; परी न थोरावती ।।

 

भव्य गोपुरासम तरुवर हा; उभा भारदस्त

भूवर रंगावली सजवली; धवल फुलांची रम्य।।

 

परिमल त्यांचा मंदमंदसा; दरवळे धूपासम

निसर्गदेवाचे देवालय; शिव सत्य सुंदरतम ।।

 

किती भव्य हा सरळ मनाचा; गगनचाफा फुलला

तरुवर उंचापुरा सुवासिक; विष्णुमूर्तिसम गमला ।।

-------------------------------

#लेखणीअरुंधतीची-