देवदंगा
गणपती गावाला
गेले आणि पंधरा दिवसांसाठी डोल्बींनी विश्रांती घेतली. हलवाई येणार्‍या नवरात्रीसाठी
मोदक मोडून बर्फ्या बनवायला सज्ज झाले आहेत. नवरात्रीच्या नऊ रंगांच्या साड्यांची तोरणं
दुकानांवर लटकवण्यासाठी साडी दुकानदार सज्ज झाले आहेत. फुलवाले, फळवाले, उपवासाचे पदार्थ
घेऊन वाणी, नारळवाले, ढोलवाले, नव्यारूपात सज्ज होत आहेत. भक्तीने उंबळणारे भक्त नव्याने
कचेरीत रजा मांडायला वा रजा न मांडता मी देवाचा नेम कसा मोडत नाही हे सांगायला/वागायला
नव्या दमाने एका पायावर तयार आहेत. एका देवाला निरोपाची पानसुपारी झाली की दुसरा देव
तुतारी वाजवत मांडवात प्रवेश करतोय. खरोखरच श्री कचेरी/ऑफिसेस चालवायला समर्थ आहे म्हणूनच
हे रहाटगाडगं सुरळीत चालू आहे अशी आता माझी अतूट श्रद्धा झाली आहे. देव आता भक्तांच्या
हातातून ओरबाडून काढून घेऊन कधीच असामाजिक तत्त्वांचा, व्यापार्‍यांचा कोटिकोटीचा देवधंदा
झाला आहे.
देवदंगा नाच नंगा । काल बाप्पा आज अंबा
पिचलेल्यांच्या कमनशिबावर । कोटि कोटिचा देवधंदा॥1
कचेरीत एकटा तिरंगा । देवासाठी सुदूर रांगा
पायी चालत घालत पिंगा । भक्तगणांची लोटे गंगा॥2
देवांचेही नशिब फळफळे । दिवस अचानक ये सोन्याचे
काल उपाशी आजचि पेढे । दुधातुपाचे घडेचि उपडे॥3
काल स्वच्छता राखायासी । कोप र्‍यात जो पदपथ राखी
आज अचानक त्याला मखरी । स्थान मिळे बहु उंचावरती ॥4
जैसी वाढे देवाची पत । लोक-नियम त्या वाटे जाचक
पोलिस ठाणे अग्नी शामक । उखडुन देती दो रात्रीतच ।।5
चेंगरले जरि भक्त गर्दिने । भडके जरि वा आग अचानक
का आग विझविण्या समर्थ बाप्पा। का गर्दीतही राखे सज्जन ॥6
देव पावतो बहु नवसाला । होता ऐसा गाजावाजा
काम सोडुनी लोक धावती । रांगांवरती चढती रांगा॥7
पानसुपारी फुलवाल्यांचा । चालू होतो एकच कल्ला
हार फुले घ्या, काढा चपला । देवदयेवर भरती गल्ला॥8
रोज छापती हजार पोथ्या । सिद्ध मंत्र वा सुरस कथांच्या
चमत्कार हे पानोपानी । पिचलेल्यांना लावि गळाला ॥9
देवावरती घेता शंका । प्रसंग येइल त्यावर बाका
धन कांचन परि तया अर्पिता । प्रसन्न होती देवदेवता ॥10
हात कांचनी पाय कांचनी । दुर्वा मरवा कुसुम कांचनी
कांचन मोदक देवा हाती । हिरे माणिके जडवुन त्यासी॥11
‘‘कांचनमृग’’ हा जनी सोडला । भले भलेही भुलती याला
आशा लावुन पिचलेल्यांच्या । काढुन घेती वित्त कांचना।।12
पाहुन देवाचा तो भपका । भक्त गोंधळे नसेचि पैका
``टाक नोट रे हा नवसाचा'' । गुरव ओरडे देउन धपका ॥13
कंठ फोडुनी गाति आरत्या । बडवित घंटा शंख नि झांजा
हलकल्लोळचि घनघोर पाहता । शांती गेली सोडुन देवा॥14
`ध्वनी दैत्य' हे पिसाळलेले। धरुन आणिती संतजनांना
`ध्वन्यस्त्रावर' जोडुन त्यांना । `लक्ष्य –कर्ण' या साधिति नेमा॥15
कामावर रडगाणे दांड्या । पालखीचा परि रुते न दांडा
कोस कोस ही चाल चालण्या । उत्साहाने चाले तांडा॥16
लोकविलक्षण भक्तीचा या । परिचय देती मार्ग, मार्गिका
हॉटेल धाबे बार जोडिला । ओतती दुर्गंधी अन कचरा॥17
टोल कराचे नाव ऐकता । तळपायाची आग मस्तका
पेट्या, हुंड्यांमधे सापडे । कोटि कोटीची मालमत्ता ॥18
तुपात निथळे शिरा केशरी । लाडू पेढे मोदक बर्फी
कमी पडे का देवा म्हणूनी । महाप्रसादा द्याचि वर्गणी॥19
``काम करा रे'' बॉस बोलता । राग राग तो नाकावरचा
दिवस दिवस रांगेत शिणोनी । देवापायी घासति माथा॥20
संस्थानाचे पदाधिकारी । त्यांना लागे फोर्ड फरारी
संस्थानावर ज्याची सत्ता । त्याला मिळते इथली मत्ता ॥22
शेयर चढती शेयर पडती । तसे
देव हे उठती बसती
लाभ उकळुनी होता पुरता । लोप पावती देव-देवता॥23
एका देवा पानसुपारी । दुस र्‍याची वाजेच तुतारी
देव उभे हे लावुन रांगा । म्हणती आता माझी बारी॥24
पृथ्वीवरती चतकर जागा । पाय ठेवण्या यांना मिळता
देवा`तर्फे' उलथुन देतील । मानवता हे रसातळाला॥25
----------------------------------------------------------------
#लेखणीअरुंधतीची-
